Panalungtikan ieu didasaran ku pasualan ngeunaan citra wanoja dina novél. Nu dibahas ngeunaan opat aspék, nya éta aya citra fisik wanoja, citra psikis wanoja, citra wanoja di kulawarga jeung citra wanoja di masarakat. Métode nu digunakeun dina panalungtikan ieu nyaéta métode deskriptif nu ngagunakeun talaah studi pustaka, ngaliwatan analisis dina buku novél jeung buku-buku sumber lianna, tujuan panalungtikan ieu nyaéta meunangkeun jeung ngadeskripsikeun sikep-sikep tokoh utama wanoja nu aya dina novél Kembang nu Dipitineung karya Tety S. Nataprawira kana opat aspék citra wanoja. Detailna panalungtikan ieu medar ngeunaan 1) aspék-aspék citra wanoja nu aya dina novél Kembang nu Dipitineung karya Tety S. Nataprawira, 2) nganalisis data-data nu dimeunangkeun tina novél Kembang nu Dipitineung karya Tety S. Nataprawira, 3) nyieun kacindekkan tina analisis nu dilakukeun. Analisis sacara deskriptif ieu nyaéta ngajelaskeun dimana “harti” citra wanoja atawa harti féminisme nu aya dina hiji data nu dianalisis. Ieu saluyu jeung tujuan panalungtikan, tujuan panalungtikan di dieu méré pangaweruh kana sakumna pamaca yén maca sikep jeung psikis dina novél ieu bisa dilakukeun ku cara ngaanlisis kekecapan atawa nganalisis dialog nu aya dina hiji novél. Méré gambaran ogé jadi pamantik pikeun wanoja-wanoja kana sikep jeung paripolah nu kudu atawa nu sakuduna dilakukeun nalika aya dina hiji kajadian atawa di lingkungan masarakat ogé sangkan pamaca beunta kana pasualan nu aya dina masarakat ngaliwatan panalungtikan citra wanoja jeung féminisme nu dipedar dina artikel ieu.